Vörumst vinstri slysin.

Virða ber valfrelsi allra og þeir sem sætta sig við að höfuðborgin sé þriðja skuldugasta sveitafélagið kjósa að sjálfsögðu vinstri flokkana. Áhugamál fólks eru mismunandi og ekki er útilokað að sumum þykir gaman að eyða hundruðum milljóna í gatnagerð sem tefur umferð og eykur slysahættu.

Þröngar götur koma ekki í veg fyrir stressið sem er hluti af okkar menningu, það eru margir að flýta sér til og frá vinnu. 

Sumir telja það nauðsynlegan fórnarkostnað sætta sig við reynslulausa borgarfulltrúa, svikulan leiðtoga og fegrunaraðgerðir við fjármálastöðu borgarinnar sbr. að setja bílastæðasjóð í A-hlutann. Það skiptir engu máli hvaða mistök eru gerð í stjórn borgarinnar, allt er fyrirgefið.

Það þykir ekkert tiltökumál þótt fjárhagsáætlun tefjist og bara pís og keik að slátra nokkrum bílskúrum í vesturbænum. Reyndar greiddi meirihlutinn atkvæði gegn eigin tillögum í skipulagsmálum, þannig að fólk þarf ekki að óttast að missa bílskúrana í bili amk.

Já, það þykir ekkert kjánalegt að meirihlutinn skuli kjósa gegn eigin tillögum. Bara nauðsynlegur fórnarkostnaður til þess að halda Sjálfstæðisflokknum frá völdum.

Þeir sem hafa þessar skoðanir sem að ofan greinir og eru sáttir við núverandi meirihluta eins og hann er, kjósa að sjálfsögðu Samfylkinguna og Bjarta framtíð. Þó það nú væri.

En sem betur fer fyrir framtíðina þá er til fólk sem hefur metnað fyrir hönd borgarinnar. Við sem viljum búa í borg sem er ekki skuldugri en mörg smærri sveitafélög kjósum að sjálfsögðu Sjálfstæðisflokkinn.

Sem betur fer er líka til fólk með sjálfstæða hugsun sem fylgist með og les sér til. Það fólk kýs að sjálfsögðu Sjálfstæðisflokkinn.

Svo eru hinir sem trúa blekkingum vinstri flokkana og halda að Sjálfstæðisflokkurinn sé spilltari en aðrir flokkar, þeir kjósa að sjálfsögðu til vinstri.

Allir stjórnmálaflokkar á Íslandi hafa gerst sekir um spillingu, en enginn hefur enn tekið saman hver hefur gert það oftar en aðrir. Það er augljós sannleikur sem blasir við öllum sem hafa sjálfstæða og gagnrýna hugsun.

Sjálfstæðisflokkurinn stjórnaði óslitið, fyrir utan eitt kjörtímabil, í sextíu og fimm ár. Og flokkurinn hafði alltaf hreinan meirihluta.

Þá var lagður grunnur að stórstígum framförum, malbikun gatna, hitaveitan osfrv. Enda voru hörðustu vinstri menn jafnvel nógu skynsamir til að kjósa Sjálfstæðisflokkinn í borginni.

Svo tók R-listinn við og stofnaði OR. Ekki þarf að fara mörgum orðum um bruðlið og erfitt er að sannfæra sanntrúaða jafnarmenn um að það hafi verið í anda Marx að bjóða upp á kjólklædda þjóna með hvíta hanska í mötuneyti höfuðstöðva orkuveitunnar. En þetta var meirihlutastjórn jafnaðarmanna eins og allir vita.

Lína-net, risarækjueldi osfrv., þetta er ástæða skulda orkuveitunnar sem Dagur B. reynir að hengja á sjálfstæðismenn.

Ef Sjálfstæðisflokkurinn nær meirihluta munum við fá ábyrga fjármálastjórn, lægri skatta og frelsi til að ráðstafa þjónustustyrkjum.

Við sem sættum okkur ekki við neitt annað en það besta í borginni kjósum að sjálfsögðu Sjálfstæðisflokkinn í vor.

Annað kemur að ekki til greina.

Athugasemdir

[Halldór Þormar Halldórsson, 20.5.2014 kl. 22:15]

Það dettur fáum í hug að tengja Sjálfstæðisflokkinn við ábyrga fjármálastjórn eftir það sem átti sér stað á árunum fyrir hrun og á meðan lfokkurinn fór með meirihlutann í borginni með hléum 2006-2010. Þá var meðal annars gerð tilraun til að gefa Hannesi Smárasyni og Bjarna Ármannssyni hluta Orkuveitunnar. En kjósendum er sama um fjármálastjórnina, enda eru þeir löngu hættir að að gera ráð fyrir öðru en hún sé afar döpur. Þeir vilja borgarstjórn þar sem ríkir friður. Þeir vilja opið og vinsamlegt samfélag þar sem ríkir jafnræði með borgurnum. Það er uppskorið sem flokkarnir sá.

[Jón Ríkharðsson, 20.5.2014 kl. 23:25]

http://www.mbl.is/frettir/innlent/2007/10/08/atti_ad_vada_yfir_okkur/.

Ef þú smellir á tengilinn fyrir ofan Halldór, sést að þau sem eru í borgarstjórnarflokki sjálfstæðismanna í dag og sátu í borgarstjórn kjörtímabilið 2006-20010 mótmæltu samruna Geysis green og REI, þess vegna sprakk meirihluti sjálfstæðis og framsóknarmanna seinni hluta árs 2007.

Nú er verið að ræða borgarmálin og þar hafa sjálfstæðismenn alltaf staðið sig betur en vinstri flokkarnir.

Fjármálastjórn stjórnmálamanna almennt er sjaldan til fyrirmyndar, því er ekki að neita. En engu að síður er hún alltaf best hjá sjálfstæðismönnum.

Þú ert greinilega í hópi þeirra sem trúir Degi, um að núverandi meirihluti hafi stuðlað að sátt í borginni. Það var sjálfstæðisflokkurinn sem stuðlaði að þverpólitískri sátt í kjölfar hrunsins og núverandi meirihluti setti hana í uppnám.

Þú getur nálgast skýrslu um stjórnsýslu borgarinnar sem núverandi meirihluti lét gera, þar kemur þetta allt fram, varðandi sáttina.

Það hefur engin sátt verið í borgarmálunum, miklar deilur um sameiningu grunnskóla í Grafarvogi svo dæmi sé tekið. Ástæðan fyrir litlum átökum í borgarstjórn skrifast á veika stjórnarandstöðu.

[Halldór Þormar Halldórsson, 21.5.2014 kl. 14:10]

Mér er nákvæmlega sama hvað Dagur segir. Hef engan áhuga á að kjósa hann eða nokkuð annað sem er í framboði, en mér þykir kosningabarátta Sjálfstæðisflokksins brjóstumkennanlega léleg.