Sérhagsmunagæsla Vinstri grænna.

Vinstri grænir hafa í gegn um árin fjallað um sérhagsmunagæslu og látið í veðri vaka, að hún eigi lítt upp á pallborð þeirra. Enda þykjast þeir manna heiðarlegastir í flóru íslenskra stjórnmála. En það virðist vera sameiginlegt með mörgum vinstri mönnum, tunga þeirra nær að framleiða ógrynni orða, sem segja ósköp lítið.

Nú er komið að því, að einstaklingar þeim hliðhollir eru í vandræðum. Það á að sækja þá til saka fyrir lögbrot, þ.e.a.s. óhlýðni við valdstjórnina og brot á friðhelgi alþingis. Einnig munu einhverjir í þessum hópi vera grunaðir um, að hafa ráðist á þingverði og lögreglumenn. Ef þessar ásakanir eru sannar, þá er um augljós lögbrot að ræða.

Það þjónar ekki hagsmunum vinstri manna að félagar þeirra séu sóttir til saka, það eru þeirra "sérhagsmunir" að þeim verði sleppt við málsókn, þá verður auðveldara að framkvæma mótmæli í framtíðinni, þegar sjálfstæðismenn komast aftur til valda. Það liggur í loftinu óstaðfestur grunur þess efnis, að Vinstri grænir hafi skipulagt mótmælin. Þeir vilja kannski hreinsa andrúmsloftið og láta kafa ofan í þessi ummæli? Nei varla, þeim leiðist að svara til saka, eins og dæmin sanna.

Málsvörnin sem þeir koma með handa þeim grunuðu er svo vitlaus, að það hálfa væri nóg. Margir segja það eðlilegt í ljósi ástandsins að menn hafi farið of geyst í mótmælum. Finnst .þeim þá ekki líka eðlilegt, að útrásarvíkingar hafi farið fram úr sér í ljósi þess, að fjármagn var auðfengið á lágum vöxtum? Hvort tveggja er jafn fáránlegt, útrásarvíkingar og mótmælendur eiga að svara til saka fyrir sínar gjörðir.

En þetta þýðir ekki að ég gleðjist, ef krakkaræflarnir verða kærðir, langt í frá. En það verða allir að axla sína ábyrgð, ég vona að níumenningarnir þroskist og læri af þessari vitleysu allri.

Allir eru jafnir fyrir lögum, þeir sem brotið hafa af sér eiga að taka út sinn dóm, sama hvar í flokki þeir standa. Það gengur ekki að vinstri menn misnoti aðstöðu sína á þingi til að hefta framgang réttvísinnar.

Þeim væri hollast að reyna að átta sig á tilgangi alþingis, en hann er ekki að koma í veg fyrir að menn séu dæmdir fyrir lögbrot, heldur að setja lög og fylgja þeim.

Athugasemdir

[Elle_, 16.5.2010 kl. 18:59]

Ég get tekið undir hvert orð í pistlinum, Jón, og fannst það stórundarlegt að lesa að Björn Valur hafi viljað ákæruna dregna til baka:http://www.ruv.is/frett/afskipti-stjornmalamanna-oaeskileg
VG er alls ekki lengur margtækur flokkur í heild með fólk innanborðs eins og Árna Þór og Björn Val og Steingrím Jóhann, sem snérist á hvolf eftir valdatökuna.  Og stendur enn á hvolfi.   Nei, það gengur ekkert upp að fólk geti ráðist á lögreglumenn og þingverði og losnað við að fara fyrir dóm.  Við búum ekki við alræði spilltra pólitíkusa, guði sé lof.   

[Jón Ríkharðsson, 17.5.2010 kl. 02:29]

Þakka þér fyrir Elle, innleggið þitt er gott og engu við það að bæta.

Við tölum sama máli í þessu sem og mörgu öðru.

[Jón Valur Jensson, 18.5.2010 kl. 03:15]

Vel skrifuð grein, nafni, tekur afar vel á málum, ekki af dómhörku, heldur réttsýni. – Með kveðju og þökk,