Er ESB aðild lausnin?

Það er að heyra á mörgum aðildarsinnum að innganga í sambandið sé eina lausnin sem við höfum. Þar skipa þeir sér í flokk með trúboðum hinna ýmsu málaflokka. Það  eru menn sem boða sannleikann í formi ákveðinna trúarbragða, boða sannleikann í stjórnmálastefnum osfrv.

En þeir gleyma alltaf einu mikilvægu atriði og það er, að sýn manna á sömu atriðin getur verið mjög ólík.

Ég hef fylgst með skrifum aðildarsinna og kíkt á síður Evrópusambandsins þar sem Brusselmenn útskýra tilgang sambandsins og stefnu. Í stuttu máli, þá hefur sá lestur ekki fengið mig til að skipta um skoðun varðandi aðild, ég vil alls ekki ganga í ESB.

Evrópusambandið byrjaði sem kola og stálbandalag með það markmið að skapa frið á milli Evrópuþjóða. Kol og stál voru notuð í vopnaframleiðslu og til að koma í veg fyrir óeðlilega framleiðslu á vopnum, þá gátu þeir fylgst með framleiðslu á aðalhráefnunum.

Svo þróaðist sambandið sem upphaflega var bandalag, svo því sé til haga haldið, í það að vera viðskipta og tollabandalag og síðan fóru það að leyfa frjálsan flutning fólks og fjármagns og efla samstarfið enn meir. Þvínæst var orðið nánara samstarf á flestum sviðum og það virðist stöðugt vera nánara og nánara.

Nú hafa margir sterkir aðilar innan ESB bent á að gott væri að Evrópa yrði að einu ríki. Ég geri mér grein fyrir að það er ekki orðið að veruleika og kannski verður það aldrei.

Það getur verið varasamt að reyna að segja til um framtíðina með óyggjandi hætti, en þessi tilhneiging Brusselmanna í átt til sameiningar finnst mér slæm. Einnig þoli ég illa of mikið af reglugerðum, ég vil halda í heiðri góða siði sem felast í gagnkvæmri tillitsemi, stela ekki frá öðrum og virða líf og heilsu samborgaranna. Það er einnig hætt við því að reglugerðarárátta ESB komi til með að vera afar hvimleið hjá meirihluta landsmanna.

En ég geri fastlega ráð fyrir að aðildarsinnar verði mjög glaðir og fagni öllum reglum frá ESB. Það er nefnilega misjafnt hvað mönnum finnst um stífar reglur, sumir finna til öryggistilfinningar meðan aðrir upplifa köfnunartilfinningu.

Fyrir rúmu ári síðan var í Morgunblaðinu rætt við Breska konu sem flutti hingað til lands. Hún hafði margt gott um íslendinga að segja, m.a. það að við notuðum reglur oftast sem viðmið en værum ekki of stíf á bókstafnum. Svoleiðis aðferðir hugnast mér afskaplega vel og mér finnst okkur hafa gengið prýðilega sem sjálfstæð þjóð. En ég veit að það finnst ekki öllum.

Einnig talaði þessi ágæta kona um sára fátækt margra í Bretlandi, hún vildi meina að fátæktin væri meiri þar en á Íslandi. Ekki ætla ég samt að segja að fátækt aukist hér á landi við inngöngu, en fátt bendir til að inngangan ein og sér hafi þar nokkuð að segja.

Íslenska þjóðarsálin er langt frá því að vera Evrópsk í háttum. Við erum óöguð og viljum helst sem minnst af boðum og bönnum. Því geta fylgt bæði kostir og gallar alveg eins og aðild að ESB.

Enginn getur hvorki neitað því né játað að ESB verði eitt ríki í framtíðinni, en þá hafa öll aðildarlöndin tapað sínu sjálfstæði algerlega. En möguleikinn er fyrir hendi eins og sagan sýnir þróun sambandsins. Þeir eru alltaf að færa sig upp á skaftið undir alls kyns yfirskyni sem lítur fallega út.

Fólk þarf að gera upp hug sinn í þessu máli sem og öðrum. Viljum við halda áfram á sömu braut og vera sama þjóðin með kostum okkar og göllum eða viljum við taka upp nýja kosti og nýja galla?

Miðað við óánægjuraddirnar sem hljóma frá aðildarlöndunum þá er það ljóst að ESB hefur ýmsa slæma galla. Brusselmenn eru eins og aðrir pólitíkusar, þeim hættir til að eyða of miklum peningum í óþarfa. Við höfum takmarkaða möguleika á að veita þeim aðhald, því hinn almenni borgari á Íslandi getur ekki veitt þeim aðhald og hætt er við að fulltrúar okkar verði meðvirkir þeim í vitleysunni.

Það er því mín niðurstaða enn og aftur, ég vil ekki sjá ESB aðild, en ég vil gott samstarf við sambandið eins og heiminn allan. Ekki vil ég kalla aðildarsinna neinum ónefnum, þeir hafa sína skoðun og hafa rétt á henni.

Ég mun ekki erfa neitt við þá ef við göngum inn, en seint mun ég þakka þeim það að hafa gert okkur að litlum hrepp í ESB ef fram heldur sem horfir.

Athugasemdir

[Valdimar Samúelsson, 23.8.2010 kl. 11:42]

Ég tek undir en mundu að þeir sem eru með áróður og gjörðir í þá átt að gangast undir ESB eru landráðamenn samkvæmt Stjórnarskránni Kafli X grein 86,87,88 ofl.

Þetta er ekkert persónulegt en þetta eru æðstu lög landsins og það á að fara eftir þeim enda hæsta brot sem nokkur getur framin sem kallast High Treason á ensku og yfirleitt lífstíðarfangelsi eða dauði sumstaðar. Þetta er bara svona

[Jón Ríkharðsson, 23.8.2010 kl. 12:49]

Þetta kann vel að vera rétt hjá þér Valdimar, en ég hef enga þekkingu á lögum og þess vegna hætti ég mér ekki út á þá hálu braut.

Ég ætla sem sagt ekki að vera ósammála þér í þessu efni og ég fagna því að fleiri en ég vilji búa í sjálfstæðu lýðveldi.

Hafðu svo kæra þökk fyrir innlitið.

[Valdimar Samúelsson, 23.8.2010 kl. 13:49]

Já vertu viss Jón við erum mörg á móti en stundum finnst mér við vera hálf máttlítl gegn þessum svikara Össuri en það þarf ekki nema einn svona ráðherra til að koma þessu í gegn.