Allt hefur kosti bæði og galla.

Í umræðunni hættir fólki til að upphefja eina hlið og fordæma aðra. Það er hættulegt og getur skapað ófyrirsjáanlegar afleiðingar.

WikiLeaks menn hafa vakið fólk til umhugsunar um ýmislegt, nefna má það sem gerðist í Írak þegar Bandarískir hermenn fóru offari. Það var óvitlaust að koma því inn í umræðuna.

En að opinbera ummæli Kínversks ráðamanns í garð Norður Kóreu manna var óafsakanlegt með öllu. Þegar hugað er að friði í heiminum, þá liggur fyrir að viss hætta getur stafað af N-Kóreu. Kínverjar eru sagðir vera í aðstöðu til að hafa áhrif á ráðamenn þar. Það að birta neikvæð ummæli í garð N-Kóreu á viðkvæmum tímum getur reynst afdrifaríkt.

Því miður er mín tilfinning sú að WikiLeak sé í sama flokki og aðrir æsifréttamiðlar, vilji leitast við að koma með fréttir sem fólk vill fá, án þess að hugsa út í afleiðingarnar.

Heimurinn okkar er langt frá því að vera fullkominn, hann er meingallaður í eðli sínu, þótt hann búi einnig yfir góðum kostum.

Stríðsrekstur er sá veruleiki sem heimurinn býr við, þótt nokkur lönd sleppi við hann.

Og fyrst stríðsrekstur er veruleiki, þá eru leyniþjónustur nauðsynlegar. Ef fótunum er kippt undan þeim þá getur skapast heilmikið hættuástand í heiminum.

Þótt mörgum sé það mjög í mun að hafa allt uppi á borðum, þá getur fylgt því meiri hætta að upplýsa sumt heldur en að halda því leyndu.

Amazon hætti að hýsa WikiLeaks

Athugasemdir

[Durtur, 2.12.2010 kl. 14:20]

Wikileaks getur ekki farið að velja og hafna eftir efninu sem um ræðir; eina leiðin til að halda hlutleysi í þessu er að birta allt, og nákvæmlega allt. Og svo er þessu eiginlega öfugt farið með leyniþjónusturnar; þær eru ekki bara fylgifiskur stríðsreksturs heldur oft helsti valdur þeirra (sjá "Bay of Pigs" og Mossadegh, CIA stofnaði líka Mujahideen etc etc...).

Þessi heimur okkar er vissulega meingallaður, og allir helstu gallar nútímans eru sprottnir af leynimakki og almennum kúkalabbahætti sem viðgengst í myrkri þekkingarleysis okkar pupulsins. Á meðan Wikileaks eru að berjast gegn leynimakkinu hafa þeir ekkert annað en kosti.