Hræðsla við útlendinga.

Hræðsla við útlendinga er ekki ný af nálinni hér á landi. Blaðamaðurinn J. Ross Browne sem ferðaðist um landið árið 1862 segir skemmtilega sögu af presti nokkrum sem hljóp skelfdur inn í bæ þegar hann leit blaðamanninn augum. Hann spurði Geir Zöega, sem var leiðsögumaður hans, hvers vegna hann hafi hlaupið inn í bæ. Geir svaraði því þá til, að presturinn hafi aldrei séð útlending áður. Síðan var þeim boðið í bæinn og guðsmaðurinn skalf eins og hrísla allan tímann sem útlendingurinn talaði við hann.

Á öðrum stað í bókinni segir Browne ansi skemmtilega frá kynnum hans af bónda nokkrum hér á landi. Sá horfði þannig á hann, að blaðamaðurinn hafði það á tilfinningunni að bóndinn væri ekki alveg viss um að hann væri sömu gerðar og íslendingar, þ.e.a.s. af holdi og blóði.

Núna, hundrað og fimmtíu árum seinna eru þó flestir íslendingar sannfærðir um að útlendingar séu sömu gerðar og við, ósköp venjulegt fólk. En samt gætir einhverrar hræðslu margra við að hafa viðskipti viðþá.

Erlendir fjárfestar hafa eignir sínar og umsvif þar sem það er hagstæðast hverju sinni. Þeim er alveg sama hvaða nafn landið hefur, þeir vilja græða.

Okkar er að sannfæra þá um að þeir græði best á að halda sínu hér á landi og jafnframt verðum við að gæta okkar hagsmuna.

Það þýðir vitanlega ekkert annað en eðlilegt samningsferli þar sem báðir græða og jafnræðis er gætt.

Ótti við útlendinga er algerlega ástæðulaus, við þurfum á þeim að halda og það þarf að sýna þeim það, að þeir þurfi á okkur að halda.

Athugasemdir

[Sigurður Alfreð Herlufsen, 17.1.2011 kl. 00:34]

Þetta er fróðleg saga. Enn þá erum við eitthvað efins gagnvart útlendingum, en eins og þú segir, þá þarf það að breytast.

Við erum fáir og smáir á mælikvarða milljónaþjóða.

Þess vegna er okkur meðfætt að fara með gát.

Það er ekkert af því í sjálfu sér, en þarf að vera blandað ákveðinni framsækni, svo viðskipti geti átt sér stað.

Hvernig heldurðu að færi Jón, ef enginn vildi kaupa fiskinn sem þú veiðir ?

[Jón Ríkharðsson, 17.1.2011 kl. 00:42]

Þakka þér fyrir þína góðu athugasemd Sigurður minn.

Vitanlega er þetta rétt hjá þér, við eigum að fara með gát og aldrei að flana að neinu.

Þetta þarf að gerast skref fyrir skref, fyrst þurfum við að bæta okkar ímynd og sýna samstöðu til þess að útlendingar treysti okkur. Við þurfum að sýna samstöðu milli atvinnurekenda og launþega, þá skynja útlendingarnir gott andrúmsloft á vinnumarkaði.

Vissulega yrði það slæmt ef enginn keypti fisk af okkur, enda þurfum við að viðhalda markaðnum og stöðugt að finna nýja.