Helvítis viðkvæmnin í vinstri mönnum.

Vinstri menn eru með afbrigðum viðkvæmar sálir og litlir í sér, svona upp til hópa, þótt það leynist stöku alvöru maður inn á milli, en þá er það yfirleitt sjálfstæðismaður í felum.

Þeir væla eins og stungnir grísir og hóta að klaga í mbl.is ef einhver hægri maður andar á þá.

Þeir þola ekki að þeim sé hallmælt, en þeir geta kallað okkur öllum þeim nöfnum sem þeir þola ekki að heyra sjálfir. Ef einhver segir eitthvað sem særir þá, það þarf ekki að vera annað heldur en sannleikurinn um yfirburði sjálfstæðismanna á hinu pólitíska sviði, þá ryðjast þeir inn á síður okkar með miklum fúkyrðaflaumi.

Það er nefnilega þannig, að eftir höfðinu dansa limirnir.

Steingrímur Joð, foringi þeirra kallaði Davíð Oddsson gungu og druslu, hinn foringinn Jóhanna Sigurðardóttir sagði að útgerðarmenn hefðu kjaft eins og skötuselir státa af, það væri hægt að skrifa heilan bókaflokk um fúkyrði vinstri manna. Ef það væri markaður fyrir þannig bókmenntir, þá væri hægt að stofna gróðafyrirtæki utan um útgáfu þessara bóka, því stöðugt bætist við.

Ef þau hins vegar fá kurteislega orðaða gagnrýni, þá finnst þeim hún ómakleg og ómálefnaleg og væla þá gjarna yfir miklu álagi.

Sem betur fer eru sjálfstæðismenn ekki orðhvatir einstaklingar, alla vega ekki þeir sem á þingi sitja, því annars væri slökkvilið höfuðborgarinnar í stöðugri vinnu við að þurrka upp gífurlegt vatnsmagn sem rynni úr augum stjórnarliða.

Steingrímur varð næstum klökkur þegar hann var spurður um ummæli sín vegna Svavars samninganna í morgunþætti Rásar 2, enda hætti þáttarstjórnandinn snarlega þegar hún sá framan í hann, það yrði hálf neyðarlegt fyrir konugreyið að hafa grætt fjármálaráðherrann í beinni útsendingu. Hún hefði þá misst starfið eins og skot og það er ekki gott á krepputímum.

Þið vinstri menn sem lesið þetta, þið megið kalla mig öllum þeim nöfnum sem ykkur dettur til hugar, það snertir mig ekki neitt.

Þið eruð óttalegar kellingar, vælið yfir því þótt talað sé til ykkar á kjarnyrtri íslensku.

En þið getið sagt allt við okkur sjálfstæðismenn sem ykkur listir, við erum það öruggir með okkur og vel kunnir okkar kostum og göllum.

Miðað við reynsluna, þá erum við betri menn því harðar sem þið dæmið okkur.

Núna líður mér aðeins betur, ég hef verið sárkvalinn af verkjum vegna slæmrar byltu sem ég hlaut í brælunni úti á sjó í síðustu viku.

Það er ágætt að skeyta aðeins skapi sínu á vinstri mönnum til að lina mestu kvalirnar, þeir hafa oft gert það við mig.

 

Athugasemdir

[Vendetta, 19.1.2011 kl. 11:25]

Skammastu þín Jón að skrifa svona vitleysu. Þú veizt vel, að það er y í lystir.

Að öðru leyti góð færsla.

[Jón Ríkharðsson, 19.1.2011 kl. 12:54]

Fyrirgefðu Vandetta, ég dauðskammast mín að sjálfsögðu fyrir þessi leiðu mistök og bið þig og aðra lesendur afsökunar á þeim.

Og þakka þér fyrir hólið, það gælir við hégómleika minnar einföldu sálar.

[Emil Örn Kristjánsson, 19.1.2011 kl. 16:04]

Sannleikanum verður hver sárreiðastur og vinstri menn sárastir... annars átti ég ekki von á því að sjá blótsyrði í fyrirsögn hjá þér, Jón minn.

Annars flottur pistill.

[Jón Ríkharðsson, 19.1.2011 kl. 16:46]

Það er nú ástæða fyrir því Emil minn.

Þessi pistill endurspeglar mínar skoðanir að ölu leiti, en ég var hvassyrtari en vanalega, vegna þess að ég var að sálast úr verkjum.

Það er reyndar frekar lágkúrulegt, ég viðurkenni það, en ég ákvað að skeyta skapi mínu á vinstri mönnum, því ég svo illur út af stanslausum kvölum dögum saman. Mér fannst í þessu reiðikasti mínu, eflaust var eitthvað sambland af kerskni líka, ágætt að skeyta einu sinni skapi mínu á vinstri mönnum, því þeir hafa oft skeytt skapi sínu á mér.

Annars var það bara nokkuð hressandi fyrir sálina að blása svona út, kannski geri ég það einhvern tíma aftur.

Maður verðu nú stundum að sleppa framan af sér beislinu Emil minn.

[Emil Örn Kristjánsson, 19.1.2011 kl. 16:53]

Maður þarf er í góðu lagi að blása stundum út, sérstaklega þegar skaðinn er ekki meiri en þetta. Það er bara hollt.