Auðveld leið til frama.

Sjaldan hefur verið eins mikið um tækifæri fyrir fólk sem gjarnan vill vekja á sér athygli og eiga möguleika á þokkalegu viðurværi, en það borgar sig ekki að láta prinsipp þvælast fyrir sér í þeim efnum.

Ef menn hugsa eingöngu um eigin hag og eru ekki þjakaðir af heiðarleik, þá er byrjunin einföld.

Best er að byrja á því að stofna bloggsíður á moggablogginu og eyjunni. Það þarf ekkert að hafa neitt fyrir því að skrifa, gott er að kenna "helvítis íhaldinu" um allt og nota þetta hugtak nokkuð oft í sínum skrifum. Líklegt er að Hrannar B Arnarsson aðstoðarmaðurinn knái líti með velþóknun á allar fyrirsagnir sem fela í sér eftirfarandi; "allt Davíð að kenna", "Davíð olli hruninu" og fleiri stórar yfirlýsingar er varða skítkast á persónu ritstjórans í Hádegismóum.

 

Svo er óvitlaust að vitna til skrifa aðstoðarmannsins hugumstóra, segja að endingin á pistlunum hans "pælum í því" hafi vakið viðkomandi til umhugsunar og hann hafi hug á að fá þessa stórkostlegu hugmynd að láni, því "pælum í því" veki heiladauða þjóð af dvala og fái hana til að sjá með skýrum hætti, hversu góð verk Jóhanna sé að vinna.

Næsta skref er vitanlega að skrá sig í Samfylkinguna og tala mátulega hátt, svo helstu stuðningsmenn Jóhönnu heyri, þeim fer fækkandi, en með lagni má finna þá á fundum á vegum flokksins, um að Jóhanna sé hetja og berjist gegn ofurvaldi helvítis íhaldsins með kvikindið hann Davíð við stjórnvölinn.

Einnig er flott að tala um útgerðarmafíuna í LÍÚ sem öllu vill ráða. Svo í framhaldinu má fá birtar greinar í Fréttablaðinu þar sem Jóhönnu er hrósað í hástert, hægt er að segja að hún hafi náð ótrúlegum árangri í efnahagsmálum á skömmum tíma, við erfiðasta tíma sem nokkuð vestrænt ríki hefur nokkurn tíma staðið frammi fyrir.

Þá opnast leiðin, væntanlega hefur einhver á vegum Jóhönnu samband við viðkomandi og fær tækifæri til að kynnast honum nánar.

Svo áður en haninn galar þrisvar, þá er viðkomandi einstaklingur kominn í tryggt starf hjá hinu opinbera og þiggur ágæt laun, þau eru ekkert í vandræðum með að fóðra það og halda fjölmiðlum í skefjum, annað eins hefur verið gert.

Svo þegar ríkisstjórnin fer frá völdum, þá þekkja þau hjá Samfylkingunni fullt af ríkum köllum sem geta reddað vildarvini flokksins fínni vinnu það sem eftir er.

Tækifærin eru næg ef fólk er tilbúið til að selja samvisku sína.

Athugasemdir

[Björn Birgisson, 31.1.2011 kl. 16:09]

Mér datt HHG í hug við lesturinn! En það er ekkert að marka mínar hugdettur!

[Jón Ríkharðsson, 31.1.2011 kl. 16:58]

Sæll Björn, ég verð að viðurkenna að ég sé húmorinn í athugasemdinni hjá þér og skil hann vel.

Ég hef lesið talsvert eftir Hannes og mér finnst það að mestu leiti mjög gott, en það eru ekki margir sammála mér um það.

Í það minnsta hef ég ekki séð neina efnislega gagnrýni um hans skrif, menn eru aðallega óhressir með hvað hann er leiðinlegur, en mér finnst hann nokkuð skemmtilegur eftir þau kynni sem ég hef haft af honum.

Hann má þó eiga það umfram hina prófessoranna, þá Þorvald Gylfason og Stefán Ólafsson, að hann viðurkenndi að hann hafði rangt fyrir sér þegar hann dásamaði útrásina hvað mest.

Þá voru þeir félagar ekki sammála, hann og Davíð, meðan Davíð varaði við útrásinni þá hóf Hannes hana upp til skýjanna.

Annars held ég að það gildi um alla sem tjá sig mikið í töluðu og rituðu máli, að því meira sem þeir gera af því, því fleiri vitleysur koma þeir með.

En ég þakka þér fyrir Björn, þú ert örugglega einn um þessa hugdettu af þeim sem lesa þetta.

[Haraldur Haraldsson, 31.1.2011 kl. 18:55]

Af ávöxtunum skulum við þekkja þá Silli og Valdi !!!,var sagt mikið hér i gamla daga/Kveðja bloggvinur og stattu þig sem áður!!!!

[Jón Ríkharðsson, 31.1.2011 kl. 19:00]

Þakka þér fyrir Halli, minn góði bloggvinur, þakka þér einnig fyrir hvatninguna.

Við berjumst í þessu saman, þú ert líka að standa þig í baráttunni og gefur ekkert eftir.