Óskaplega eru þeir tregir.

Þetta höfum við sjómenn vitað ansi lengi, en það virðist taka hina hámenntuðu sérfræðinga Hafró lengri tíma en okkur sjóarana að átta sig á, hvað er að gerast í sjónum.

Það hefur verið erfitt oft að ná karfa á haustin, því þá heldur hann sig meira uppi í sjó.

En síðustu haust hefur verið nokkuð auðvelt að veiða hann, þannig að þetta eru ekki nýjar fréttir.

Það hafa verið bannaðar veiðar á stórum bletti fyrir sunnan land ansi lengi og vitað er að þar er gífurlegt magn af karfa.

Vestur á Halamiðum er karfinn farinn að láta sjá sig aftur, en hans varð lítið vart þar í nokkur ár, nú er hægt að fá hann í svona þokkalegu magni, sem meðafla með þorski.

Í allavega tvö ár hefur vesalings skipstjórinn sem ég er með, verið í vandræðum, vegna þess að sama hvar hann dýfir trolli, allstaðar er karfi.

Við erum að leita að ufsa, það er kastað á hefðbundinni ufsaslóð, en upp kemur karfi og þorskur og hægt er að finna einn og ein ufsa ef leitað er vandlega í fiskihrúgunni.

Svona er þetta bara, en fiskifræðingarnir eru seinir að átta sig eins og oft áður. Við hefðum getað veitt margfalt meira magn af karfa heldur en gert hefur verið undanfarin ár, þannig að tapið fyrir þjóðarbúið skiptir þá einhverjum milljörðum.

Sama er að segja um þorskinn, það er hægt að troðfylla skipið túr eftir túr af þorski, en það má ekkert veiða.

Enda sagði skipstjórinn við mig í síðasta túr, eftir að hafa verið á hröðum flótta undan þorski og karfa, að það væru aldeilis breyttir tímar; "hér áður fyrr voru menn reknir ef þeir fiskuðu lítið, nú eru menn reknir ef þeir fiska mikið".

Við erum mjög heppnir, hvort sem um er að ræða náð frá Himnaföðurnum eða óvanaleg leikni félaga minna í brúnni, skipstjóra og fyrsta stýrimanns sem báðir eru reyndar afburðamenn, að okkur tekst alltaf að veiða það sem útgerðin óskar eftir, allavega höfum við ekki þurft að henda neinu, því það að henda verðmætum í hafið er óskaplega sárt eins og gefur að skilja.

Ég held að stjórnvöld ættu að ræða betur við Jón Kristjánsson fiskifræðing og sjá hvað kæmi út úr því, hann virðist hafa ansi gott vit á þessum málum.

Annars efast ég um að það verði rætt við Jón, gáfaðir menn eiga ekki upp á pallborðið hjá ráðherrum landsins um þessar mundir eins og alkunna er.

Viðbót gefur 3 milljarða

Athugasemdir

[Eyjólfur G Svavarsson, 19.5.2011 kl. 16:48]

Jón" Mikið afskaplega er maður feginn að vera hættur til sjós, ekki vegna þess að það sé leiðinlegt! Heldur út af þessu sem þú ert að tæpa á, það er búið að vera martröð í gegnum tíðina!!!!

[Jón Ríkharðsson, 19.5.2011 kl. 18:14]

Það er svo sem ekki alslæmt að vera á sjónum Eyjólfur minn, en þú hlýtur að vera feginn að vera laus við helvítis brælurnar og allt þetta bras sem getur fylgt þeim, rifið troll, óklárt osfrv.

Annars er maður orðinn svo samdauna þessu, ég veit ekki hvort maður myndi vilja gera eitthvað annað.

[Eyjólfur G Svavarsson, 20.5.2011 kl. 00:50]

Jú víst er maður feginn því. En það er eins og sjórinn togi alltaf í mann aftur og aftur.

[Jón Ríkharðsson, 20.5.2011 kl. 13:04]

Já Eyjólfur minn, ég get alveg skilið það.

Ég vann nokkur ár í landi og þá fann ég fyrir þessu sem þú lýsir.