Sjálfstæðisflokurinn hugsar um fólkið í landinu.

Útlendur hagfræðingur að nafni Marco Pietropoli bendir á þá staðreynd, sem þekkt hefur verið lengi, að Sjálfstæðisflokkurinn hugsar um fólkið í landinu, öðrum flokkum fremur.

Hann nefnir vissulega ekki Sjálfstæðisflokkinn, en flestir sem ekki eru blindaðir af reiði og hatri, skilja hvað hann meinar.

Enginn flokkur hefur bætt lífskjör hér á landi meira en Sjálfstæðisflokkurinn.

Stjórn hinna vinnandi stétta setti á lög um almannatryggingar árið snemma á fjórða áratugnum, en í ljósi sögunnar hefur vinstri flokkum ekki gengið vel í ríkisstjórn, þannig að ekki var hægt að fullkomna verkið, fyrr en sjálfstæðismenn komu að málum.

Það var "Nýsköpunarstjórnin" undir forystu sjálfstæðismanna sem fullkomnaði verkið og kom á fót alvöru kerfi, sem þjóðin gat verið stolt af, vegna þess að sjálfstæðismenn hugsuðu líka um uppbyggingu atvinuveganna, en flestir aðrir en hatursfullir vinstri menn vita að velferðarkerfin þarf að fjármagna með raunverulegum peningum, en ekki skattahækkunum og lántökum.

Ekki skal farið nánar í löngu liðna fortíð í bili, heldur skulu staðreyndir sem eru nær okkur í tíma skoðaðar.

Sjálfstæðismenn sáu til þess, að hárrétt ákvörðun var tekin, þegar bankarnir voru látnir falla, það sparaði okkur nokkur þúsundir milljarða, sjálfstæðismenn sáu líka til þess, að lánasöfnin voru yfirtekin með afföllum, til þess að koma til móts við skuldug fyrirtæki og heimili í landinu.

Vitanlega eyðilögðu vinstri menn þetta, enda hafa þeir sýnt það og sannað, að þeir eru óhæfir til að hugsa um hagsmuni þjóðarinnar.

Á meðan annar flokkurinn treystir sér ekki til annars en að treysta á ESB, þá svíkur hinn flokkurinn kjósendur sína, því VG lofaði því fyrir kosningar, að þeir myndu berjast gegn ESB aðild.

Ekki er hægt að standast þá freistingu að fara aðeins í söguna, en á síðari hluta sjötta áratugs síðari aldar, var myndað svokallað "Hræðslubandalag", en það var aðferð vinstri flokkanna til að halda sjálfstlæðismönum frá völdum.

Vinstri flokkarnir lofuðu þá, að segja skilið við NATO og reka herinn úr landi. 

Hvers vegna var það ekki gert?

Jú vinstri menn vilja frekar taka lán, heldur en að stuðla að verðmætasköpun, því þeim er svo illa við að fólk græði. Bandaríkjamenn buðu vinstri stjórninni hagstætt lán, gegn því að þeir fengju aðstöðu hér á landi fyrir herinn sinn.

Þanig að svik vinstri manna við kjósendur sína ættu ekki að koma neinum á óvart, sagan er alltaf að endurtaka sig.

Eflaust hafa sjálfstæðismenn ekki getað staðið við allt sem þeir hafa lofað, en það má fyrirgefa þeim en ekki vinstri mönnum.

Sjálfstæðismenn eru ekki stöðugt að grobba sig af réttsýni, heiðarleika og stefnufestu, því þeir hafa þá skynsemi til að bera og þá auðmýkt til að vita, að heiðarleiki og réttsýni eru hverjum manni erfið og krefjandi markmið, en samt ber að vinna að þeim af fullum heilindum.

Breyskleiki okkar er til staðar, við þurfum að kannast við hann til að sigrast á honum.

"Það vorum við sem brugðumst, ekki sjálfstæðisstefnan", "við sofnuðum á verðinum", þetta eru tilvitnanir í ýmsa forystumenn Sjálfstæðisflokksins eftir hrun.

Hvað gerir Samfylkingin?

Jú hún kennir sjálfstæðismönnum um allt klúðrið hjá sér og þykist hvergi hafa komið nálægt neinu öðru, en að sýna meðvirkni með sjálfstæðismönum.

Og VG?

Þau eru heppin að hafa ekki verið í ríkisstjórn á árunum fyrir hrun, því þá hefðu þau ekki getað grobbað sig eins og þau gera í dag.

VG lætur öll prinsipp lönd og leið og hlýðir öllu, ef ráðherrastólar eru í boði. "Kettirnir" sem Jóhanna hefur verið að smala, eru ýmis hraktir í burtu, eða þeim gefinn rjómi að lepja.

 

Íslenska leiðin til fyrirmyndar

Athugasemdir

[Axel Jóhann Hallgrímsson, 22.7.2011 kl. 14:49]

Það eru eflaust margir komnir með krampa af hlátri yfir fyrirsögninni einni.

[Guðmundur Ásgeirsson, 22.7.2011 kl. 15:00]

Voru Sjálfstæðismenn að hugsa um fólkið í landinu þegar þeir veittu á annað hundrað milljörðum af almannafé inn í verðlausa peningamarkaðssjóði til að beila út braskfjárfestingar vina sinna?

Var Sjálfstæðismaðurinn í Seðlabankanum að hugsa um fólkið  í landinu þegar hann tapaði hundruðum milljarða úr sjóðum þess í veðmáli um að ónýtt bankakerfi myndi haldast á fótum? Eða þegar hann ráðlagði bönkunum að skrá ólöglega gengistryggð krónulán til innlendra aðila sem erlendar eignir, og stuðlaði þannig að fölsun þjóðhagsreikninga af áður óþekktri stærðargráðu sem gerði bönkunum kleift að svíkja út bílfarma af alvöru gjaldeyri sem voru svo sendir til Tortola í stað þess að nýtast til greiðslu fyrir innflutning á vörum og þjónustu?

Voru Sjálfstæðismenn að hugsa um fólkið í landinu þegar þeir lýstu yfir að innstæðum yrði bjargað að fullu, langt umfram skyldu, aðgerð sem gagnaðist fyrst og fremst þeim innan við 5% sem áttu hærri fjárhæðir á bankabók en venjulegur launamaður fær að sjá á sinni starfsævi?

Þú segir "að lánasöfnin voru yfirtekin með afföllum, til þess að koma til móts við skuldug fyrirtæki og heimili í landinu." Málið er bara að það hefur aldrei verið sýnt fram á með nokkrum hætti, að þetta hafi í raun verið planið. Lánasöfnin voru metin lágt vegna þess að menn trúðu því í raun og veru að það myndi aldrei nema helmingur þeirra nokkurntíma fást greiddur, það var ekki góðmennska heldur "ískalt hagsmunamat".

Ég skal svo segja þér hvað tók steinnin úr fyrir mitt leyti, það var þegar Geir og Solla sprönguðu fram fyrir myndavélarnar á einum fréttamannafundinum skömmu eftir hrun og boðuðu "aðgerðir í þágu skuldsettra heimila". Í hverju fólust þær? Jú, þau ætluðu að láta okkur hafa barnabæturnar mánuði fyrr og dreifa greiðslunum á fleiri gjalddaga. Líklega áttuðu þau sig ekki á því þegar yfirlýsingin var gefin að fyrir þessu skorti þau lagaheimild. Enda kom það á daginn að engar barnabætur bárust fyrr en á sínum venjulega gjalddaga, og þær voru ekki krónu hærri en venjulega. Eftir þetta ákvað ég að láta ekki bjóða mér slíka lygaþvælu lengur, skundaði niður á Austurvöll og tók þátt í að fella þáverandi ríkisstjórn.

En voru þá Sjálfstæðismenn kannski að hugsa um fólkið í landinu þegar þeir mæltu með því síðastliðið vor að við tækjum að okkur að borga skuldir gamla Landsbankans? Og ákváðu þar með að treysta Steingrími til að skrifa undir óútfylltan tékka sem í dag er metin á 100 milljarða (AGS júní 2001) og sem hefur komið á daginn að var aldrei nema gúmmítékki sem hefði kallað yfir okkur þjóðargjaldþrot. Átti það að vera í þágu almannahagsmuna?

Og eru Sjálfstæðismenn að hugsa um fólkið í landinu, þegar þeir berjast með kjafti og klóm fyrir því að útvaldir einkavinir þeirra á borð við núverandi vinnuveitanda Seðlabankastjórans fyrrverandi, fái að halda áfram að veðsetja eignarhlutina okkar hinna í fiskveiðiauðlindinni fyrir brasklánunum sínum? Vitandi að slík veðsetning er kolólögleg!

Ekki misskilja mig og túlka þetta þannig að ég sé eitthvað hrifinn af núverandi stjórn, hún er það eina í pólitík sem hefur valdið mér meiri vonbrigðum en Sjálfstæðisflokkurinn með því að taka vont ástand og gera það mun verra en efni stóðu til. Og enn fremur þekki ég marga sjálfstæðismenn sem er einmit mjög umhugað um almannahagsmuni. Þá er bara ekki að finna í flokksforystunni og í þingflokknum eru þeir í miklum minnihluta. Ég hallast því á þá skoðun að annaðhvort er meirihluti Sjálfstæðismanna í röngum flokki, eða þá að þeir kunna ekki að kjósa sér forystumenn. Margt af þessu er ágætis fólk engu að síður, bara svo lengi sem það er að braska með sína eigin hagsmuni en ekki annara.

Meðal fleiri afreka Sjálfstæðismanna fyrr og síðar (listinn er ekki tæmandi):

- Stuðningur við ólöglegan stríðsrekstur bandarískra heimsvaldasinna.

- Einkavæðing bankanna og sú ákvörðun að breyta Íslandi í aflandseyju fyrir braskara, undir hinu fagra heiti "alþjóðleg fjármálamiðstöð". Afleiðingin varð stærsta fyrirtækjagjaldþrot sögunnar, og það var ekki miðað við neina höfðatölu heldur fjárhæðina sjálfa.

- Árni Johnsen, sérstakur áhugamaður um brekkusöng og byggingarefni.

- Sturla Böðvarsson sem nýlega reyndi að selja Hreyfingunni umfjöllun í bók sem stendur til að gefa út og markaðssetja sem einhverskonar "sögulega heimild". Sturla er líka í stjórn Byggðastofnunar á sama tíma og fyrirtæki sem hann stendur að þiggur þaðan lánveitingar til uppbyggingar atvinnureksturs. Sturla sem er fyrrverandi forseti Alþingis segist ekki sjá neitt athugavert við þennan ráðahag.

- Tryggvi Þór Herbertsson. Íslandsmeistari í taprekstri meðalstórra fjármálafyrirtækja.

Afsakið á meðan ég kyngi ælunni.

[Helgi Rúnar Jónsson 22.7.2011 kl. 16:03]

Sæll Jón

Þetta er mjög góð leið hjá þér til að vekja athygli á blogginu hjá þér...en líka sprenghlægilegt í leiðinni...njótið vel.

[Sævar Finnbogason, 22.7.2011 kl. 17:01]

Skemmtilegt

[Gísli Ingvarsson, 22.7.2011 kl. 17:18]

áttu annan?

[Jón Ríkharðsson, 22.7.2011 kl. 17:40]

Það er fínt að geta komið fólki til að hlægja Axel, þótt það hafi ekki beinlínis verið markmiðið.

En ef ég get vakið hlátur hjá fólki, þá hef ég þó gert góðverkið mitt í dag.

[Jón Ríkharðsson, 22.7.2011 kl. 18:03]

Þakka þér fyrir athugasemdirnar Guðmundur, þú kemur með góð og gild rök fyrir þínu máli og þannig á það að vera. 

Það er heilmikið til í því sem þú segir, enda hef ég komið inn á það í mínum pistlum, að sjálfstæðismenn hafa gert mistök, sum ansi stór og á árunum fyrir hrun voru flestir ansi veruleikafirrtir og sjálfstæðismenn voru ansi langt frá því, að vera tengdir við raunveruleikann á þessum tíma. Það verða allir sjálfstæðismenn að kannast við og leitast við að læra af mistökunum.

Í sumum atriðum í þínum athugasemdum er ég þér ekki fyllilega sammála, en þau atriði sem ég bregst ekki við, þar er ég þér fyllilega sammála og vil ekki verja, því mér er illa við að verja einhverja vitleysu.

Tapið í Sðlabankanum kemur til vegna þess, að það var verið að gera, eins og fleiri Seðlabankar í öðrum löndum, reyna að halda bönkum á floti. Eftir á að hyggja, þá voru þetta mistök, en það óraði engum, í stjórnsýslunni, fyrir því, hversu bankarnir voru raunverulega eitraðir. En þarna tel ég menn hafa verið að vinna samkvæmt bestu vitund, miðað við vitneskju þess tíma. Það er auðvelt að vera vitur eftir á.

Ég held að það hafi verið að hugsa um fólkið í landinu í þessu tilfelli, en vissulega má segja, að gengið hafi verið of langt.

Ekki hef ég heyrt eða séð neinar staðfestar heimildir fyrir því sem þú segir um lánasöfnin, enda getur margt farið framhjá mér. En eitt er ljóst, að möguleiki var að lækka lán hjá fólki, en í staðinn fór það til erlendra vogunarsjóða. Eg fékk mínar upplýsingar varðandi þetta hjá Ólafi Arnarsyni á Pressunni, en mér finnst óeðlilegt að hann sé að hrósa sjálfstæðismönum að ástæðulausu. En vera má að ég hafi rangt fyrir me´r í þessu sambandi og þá verður það svo að vera.

Ég verð nú aðeins að bregðast við þessu, með Icesave. Ég og meirihluti sjálftslæðismanna barðist gegn Icesave allan tímann, frá því að Svavars vitleysan byrjaði. Því miður kom einhver vitleysa í koll forystunnar og einhvers hluta þingliðsins, en þau brugðust rétt við, með því að samþykkja þjóðaratkvæðagreiðsluna. En ég hef ekki ennþá skilið forystuna í þessu máli.

Einkavæðingu bankanna má vissulega gagnrýna, en hún ein og sér orsakaði ekki hrunið. Eftir á að hyggja, þá hefðu menn aldrei átt að ímynda sér að Ísland yrði alþjóðleg fjármálamiðstöð, við erum fiskveiðiþjóð fyrst og fremst. En margir trúðu þessu og þar á meðal ég, því miður þarf að horfast í augu við það.

Annars var pistillinn hugsaður sem leiðrétting umræðunnar fyrst og fremst, Sjálfstæðisflokkurinn hefur lagt mikið af mörkum, því er ekki hægt að neita, hann hefur unnið mjög gott starf í þágu lands og þjóðar.

En heimska flokksins og vandræðagangur á árunum fyrir hrun, það er allt saman staðreynd og sem sjálfstæðismaður skammast ég mín mikið fyrir það.

Svo er að sjá hvernig gengur að læra af þessum stóru mistökum, það leiðir tíminn í ljós.

[Jón Ríkharðsson, 22.7.2011 kl. 18:11]

Helgi Rúnar,Sævar og Gísli.

Mikið væri nú gott ef þið kæmuð með einhverjar röksemdir eins og Guðmundur Ásgeirsson, hann sýnir þó allavega skynsemi og hæfileika til rökræðu.

Allt sem ég segi í pistlinum get ég staðið við og þið hafið heldur ekki mótmælt einu atriði í honum.

Ég verð að viðurkenna að eitt atriði þarf ég að skoða betur, það er varðandi niðurfærslu lánasafna, það kann að vera rangt mat hjá mér, ég bíð eftir að Guðmundur vísi mér á heimildir.

Þótt Sjálfstæðisflokkurinn hafi gert mörg slæm mistök, sem enginn þrætir fyrir, á árunum fyrir hrun, þá hefur hann staðið sig langbest allra flokka hér á landi.

[Elle_, 23.7.2011 kl. 19:28]

Ekki var forysta Sjálstæðisflokksins að hugsa um fólkið í landinu í heimskum stuðningi sínum við Jóhönnuliðíð í ICESAVE, Jón.  Og ekki heldur í skuldamálum landsmanna.  Málið er þeir haga málflutningi sínum oft, alltof oft, eins og þeir séu á móti e-u sem mun skaða landið og þjóðina en koma svo í lokin og vilja það endilega þegar þeir sjá að málið gæti kannski farið á hinn veginn.  Það er lúmskulegt og óheiðarlegt og þannig var það í ICESAVE.

[Jón Ríkharðsson, 23.7.2011 kl. 19:35]

Fólk hefur nú mismunandi skoðanir, ég held að þau hafi takið sig vera að gera rétt, en vitanlega var þetta kolrangt hjá þeim.

Enda var meirihluti sjálfstæðismanna á móti því að samþykkja Icesave að mig minnir.

[Óskar, 23.7.2011 kl. 19:48]

Fyrirsögnin fékk mig til að skellihlægja í fyrsta skipti í dag.  Takk!

[Elle_, 24.7.2011 kl. 17:05]

Jón, mér finnst bara núverandi forysta Sjálfstæðisflokksins ístöðulaus og ótrúverðug og veikluleg.  Og grátlegt að hafa svona mann í stjórnmálum landsins.

[Guðmundur Ásgeirsson, 29.7.2011 kl. 16:44]

Sæll Jón. Upplýsingarnar sem ég hef um lánasöfnin eru fengnar úr ýmsum áttum, skýrslu fjármálaráðherra um endurreisn bankanna, hagtölum seðlabankans og útgefnum ritum hans, rannsóknarskýrslu Alþingis, álitum ESA o.fl. Ég hef einnig sótt fyrirlestra og kynningar á vegum Seðlabankans og fylgst náið með fréttaumfjöllun um þessi mál. Sem stjórnarmaður í Hagsmunasamtökum Heimilanna hef ég að auki fengið til mín allskyns upplýsingar og fróðleik, bæði skriflega og munnlega. Ég tel mig því vera með staðreyndirnar nokkuð á hreinu, en auðvitað dreg ég mínar sjálfstæðu ályktanir útfrá þeim, sem aðrir eru annaðhvort sammála eða ekki.