Heimurinn þarf að móta ný viðmið.

Þetta er undarlegur heimur sem við lifum í, fjölmiðlar gefa það í skyn, að snarbrjáluð illmenni séu afskaplega gáfuð og klár, jafnvel þótt þau drepi samborgara sína með köldu blóði.

Lesa má frásögn af "miskunnsemi" illmennisins í Noregi, en þar segir frá 11. ára dreng sem baðst griða og illmennið leyfði barninu að lifa. Svo er líka sagt frá manni á sundi, sem hinn óhugnalega illi byssumaður sleppti að skjóta.

Svo átti norðmaðurinn víst að hafa ritað margt gáfulegt, eins og að einn maður með hugsjón geti gert meira gagn en hundrað þúsund manns sem hugsa um eigin hag.

Fræðimenn og fjölmiðlar hafa náttúrulega gert þetta lengi, að upphefja illmenni og óþverra. Hver hefur ekki lesið um það, hversu Hitler var nú gáfaður, sumir vilja meina að hann hafi verið grænmetisæta, því hann vildi ekki drepa dýr, slík var víst góðmennska illmennis sem hikaði ekki við að drepa menn, konur og börn fyrir það eitt að hafa fæðst sem Gyðingar.

Vitanlega á heimurinn að fordæma þá sem ógna lífi fólks, jafnvel þótt viðkomandi sé ekki alslæmur og hafi ágæta eðlisgreind til að bera jafnvel ansi góða eins og mörg illmenni státa víst af.

Fjölmiðlar og fræðimenn hafa oft litið framhjá ýmsum staðreyndum ef verið er að verja einhvern málstað, hvers vegna er ekki þá hægt að horfa framhjá þeirri staðreynd, að illmenni geti haft einhverja góða kosti?

Með því að fordæma ilmenni og fjalla sem minnst um þeirra kosti, frekar að gera lítið úr þeim, þá er allavega ekki verið að veita illmennum framtíðar innblástur til fleiri illverka.

Athugasemdir

[Sigurður Alfreð Herlufsen, 25.7.2011 kl. 13:55]

Þetta er laukrétt hjá þér ágæti bloggvinur.

Við þurfum að hugsa heildrænt og skírt og megum ekki undir neinum kringumstæðum upphefja illmenni. Þeir eiga enga næringu að fá frá okkur sem viljum lifa í sátt og samlyndi. 

Við getum leyft okkur að hafa hinar ýmsu skoðanir á dægurmálum, en verum staðföst í grundvallarmálum og sýninni á réttu og röngu, þegar þar að kemur.

[Jón Ríkharðsson, 25.7.2011 kl. 14:46]

Kæri bloggvinur, við erum sammála í þessu eins og svo mörgu.

Við vitum það Sigurður minn, að kærleikurinn er sterkasta aflið og kærleikurinn viðurkennir eki illskuna, heldur afneitar henni með öllu.