Nauðsynlegt að skipta reglulega um prinsipp.

Frændi minn einn var á sínum yngri árum ógurlega duglegur vinnuþjarkur, hann var sívinnandi alla daga. Hann sagði mér að hann fengi hvíld út úr því að fara í önnur störf, þá endurnærðist hann fullkomlega.

Þessi ágæti maður starfaði sem trésmiður, en honum fannst gaman að skreppa túr og túr á togara, hjálpa til við sveitastörf osfrv.

Sama má segja um Steingrím J. Sigfússon, hann er vitanlega stöðugt með hin ýmsu prinsipp og til að fá tilbreytingu frá gráma hversdagsins, skiptir hann reglulega um prinsipp.

Hann var alfarið á móti því að greiða Iceve og vera í samstarfi við AGS. Þetta prinsipp ver ríkjandi hjá honum í smátíma, en þar sem að þetta eru stór mál, þá er nauðsynlegt að endurnýja prinsippin til að ofkeyra sig ekki á erfiðum prinsippum, breyta til eins og frændi minn gerði gjarna.

Þá ákvað hann að setja sér það prinsipp að vera eindreginn talsmaður þess að borga Icesave og vera í samstarfi við AGS, það frískaði upp á tilveruna hjá honum.

Svo hafði hann prinsipp varðandi þjóðaratkvæðagreiðslur, á alþingi sagði hann í ræðu að ekkert mál væri svo flókið að það hentaði ekki í þjóðaratkvæði.

Eftir að hafa burðast með slíkt prinsipp ansi lengi, ákvað hann að breyta til og hann greiddi atkvæði gegn því að þjóðin fengi að kjósa um hvort sækja ætti um aðild að ESB, sló þar tvær flugur í einu höggi og breytti um prinsipp varðandi aðild að ESB, það hefur verið hressandi fyrir hann.

Áratugum saman hafði hann burðast með sama prinsippið, að hugsa um hag alþýðunnar, það var orðið frekar einhæft og kominn tími á að breyta til.

Þess vegna afhenti hann erlendum vogunarsjóðum afföll lána og það var nú aldeilis hressandi tilbreyting. Til að kóróna breyttan lífsstíl ákvað hann að dæla tæpum tvöhundruð milljörðum í fjármálafyrirtæki, nú var hann eins og nýhreinsaður hundur.

Það hentar sumum að breyta reglulega um prinsipp og ekkert við því að segja.

En það er spurning hvort þjóðin eigi að velja stjórnmálamenn sem fá leið á sínum lífsskoðunum með reglulegu millibili.

Er ekki best að jarðfræðingurinn velti fyrir sér síbreytileika jarðarinnar, þá getur hann öllum að skaðlausu skipt út eins mörgum prinsippum og honum sýnist.

Lítið fylgi hefur ekki áhrif

Athugasemdir

[Sveinn R. Pálsson, 13.9.2011 kl. 16:01]

Óttalegt bull er þetta nú. Þeir sem lána peninga gegn skuldabréfi, geta selt öðrum skuldabréfið, yfirleitt með afföllum. Örfá prósent af skuldabréfum sem erlendir bankar fengu á sínum tíma fyrir að lána Glitni og Kaupþingi á sínum tíma, hafa verið seld öðrum aðilum. Þeir aðilar hafa hugsanlega selt einhverjum öðrum þessi bréf. Þannig ganga þau kaupum og sölum. Steingrímur hefur ekkert með þau viðskipti að gera. Þessi viðskipti fara fram erlendis, milli aðila sem eru í svona viðskiptum eins og hverjum öðrum bissness. Hvernig er það, vilja sjálfstæðismenn banna þessi viðskipti með bréfin?

Staðreyndin er sú að megnið af húsnæðisskuldabréfum landsmanna eru í eigu íbúðalánasjós, lífeyrissjóðanna og núverandi banka.

[Jón Ríkharðsson, 13.9.2011 kl. 16:09]

Nei, sjálfstæðismenn vilja ekki banna viðskipti, en við hefðum gjarna vilja að afföllin væru nýtt til að afskrifa lán hjá íslendingum.

Það hefði verið betra, svona að okkar mati Sveinn minn þótt þér finnist það vitanlega óttalegt bull.

Það er fallega gert að vera góður við Steingrím, ekki veitir honum af vinum um þessar mundir.

Mér er ekkert illa við kallinn, en ég vil ógjarna hafa hann í þessu embætti.

[Sveinn R. Pálsson, 13.9.2011 kl. 16:14]

Þeir sem eru í þessum bissness gera þetta sín á milli og þetta fer þar að auki fram utan okkar lögsögu. Afföllin fær sá sem kaupir bréfin en hann tekur jafnframt áhættuna. Lögmál þessara viðskipta eru því ósköp einföld, en íhaldið trúir vanalega á barbabrellur, einhver annar en sá sem tekur áhættuna á að fá gróðann.

[Jón Ríkharðsson, 13.9.2011 kl. 17:11]

Þetta er flott hjá þér Sveinn minn, góð viðleitni við að verja slæman málsstað.

Ég óska ykkur vinstri mönnum til hamingju með að ná mögulega heilu kjörtímabili, það hefur ekki tekist áður og ólíklegt að slíkt gerist aftur á næstunni.

Ég er ánægður með að geta slakað örlítið á, því mér leiðist að vera stöðugt að fletta bókum og googla til að reka ofan í ykkur vitleysurnar.

Nú er fylgið við vinstri stjórnina 26%, þannig að þjóðin er loksins að átt sig á eyðleggingarmætti vinstri stjórna.

Nú getum við sjálfstæðismenn slakað á í vörninni og tekið til við að hreinsa til eftir vinstri stjórnina, en það er auðvelt, því íslenska þjóðin er svo þróttmikil og vön að vina sig út úr vandræðum.

Ég ætla að gefa þér nú sviðið og haltu endilega áfram að segja þínar skoðanir á íhaldinu og dásama vinstri stjórnina.