Hvar er lýðræðisástin hjá Hreyfingunni?

Borgarahreyfingin var kjörin á þing fyrir síðustu kosningar og þau ætluðu aldeilis að breyta til batnaðar.

Ekki skal efast um einlægan og góðan ásetning hjá þeim, en þau þurfa að gera sér grein fyrir því, að það er enginn munur á þeim og öðrum mönnum.

Til þess að þroska sig og efla, þarf að gera það með jákvæðu hugarfari og djúpri sjálfsskoðun.

Vissulega er það rétt, þjóðin þarf að endurskoða sig frá grunni, það á við um stjórnmálamenn jafnt sem almenning.

Borgarahreyfingin klofnaði fljótlega og þingmenn hennar ásamt öðru fólki myndaði nýjan hóp sem kallar sig Hreyfinguna. Þetta ágæta fólk kveðst þrá lýðræði mest af öllu og það er vissulega gott. En hvernig gengur þeim svo með framkvæmd þessa háleita markmiðs?

Það kom fram krafa á alþingi um kosningar, þannig að almenningur fengi að kjósa sér fulltrúa á þing.

Lýðræðiselskandi þingmaður Hreyfingarinnar greiddi atkvæði gegn því, að fólkið fengi að kjósa. Varla telst það dæmi um mikla lýðræðisást.

Svo hefur annar þingmaður Hreyfingarinnar sagt það, að sjálfstæðismenn ættu að halda sig til hlés, helst að hætta á þingi.

Vissulega hlaut Sjálfstæðisflokkurinn ekki góða kosningu, en 23,7% kjósenda völdu hann sem sinn málssvara á þingi. Ætlar þá hinn lýðræðissinnaði þingmaður að virða vilja 23,7% kjósenda að vettugi og svipta þá sínum eðlilegu lýðréttindum, sem felast í því að láta rödd sína hljóma?

Þeir hafa allir gengið svo langt, að segja að allur þingheimur ætti að víkja, nema þau þrjú að sjálfsögðu, því að hinir þingmennirnir tala víst ekki í anda þjóðarinnar.

Kjósendur þremenninganna voru 7.2% kosningabærra manna og ekki virðist fylgi þeirra vera að aukast.

Lýðræði þýðir það, að meirihlutinn ræður. Ekki er sjálfgefið að það sé hagstæðasta niðurstaðan, en lýðræðið virkar samt þannig.

Og fyrst að fólk dáist að lýðræðinu, hvers vegna þá ekki að virða það?

Svo eiga þau að gera eins og allir stjórnmálaflokkar eiga að gera, kynna sínar hugmyndir og leiðir að bættu samfélagi, án þess að vera í persónulegu skítkasti.

Kannski vita þau hvað virkar betur en það kerfi sem notað er í öllum vestrænum lýðræðisríkjum, en svo stórfelldar breytingar kalla vitanlega á ítarlegar útskýringar.

Athugasemdir

[Eyjólfur G Svavarsson, 15.10.2011 kl. 13:40]

Já" Jón minn, Það verður mörgum fótaskortur á tungunni þegar talað er um líðræði. Talandi um Hreyfinguna, þá finnst mér þessi flokkur ekki vera með mörg úrræði á þingi, en virðist vera nokkuð góður í því að gagnrína aðra. En mér finnst þetta líka eiga við hina flokkana. Ég gæti bent á nokkur dæmi um einhliða ákvarðanir ráðherra á málum, sem hefðu átt að fara í gegnum ráðuneitið, en ég ættla ekki að telja það upp hér. Enda held ég að þú vitir að þetta er svona,í öllum flokkum, þannig að líðæðið er ekki að virka hér á landi frekar en annarsstaðar, því er nú fjandans ver. En Alþingi verður að fara að taka á honum stóra sínum og reina að byggja upp traust hjá fólkinu í landinu, annars verður ekki starfsfriður á þingi

[Jón Ríkharðsson, 16.10.2011 kl. 00:50]

Þakka þér fyrir Eyjólfur minn, ég er sammála þér.