Voru eingöngu stórútgerðarmenn að mótmæla?

Fyrir forvitnissakir ákvað ég að mæta á Austurvöll og sjá í fyrsta skiptið, hvernig upplifun það er að vera viðstaddur mótmæli þar.

Ekki get ég sagt að það hafi verið skemmtileg lífsreynsla, hávaðinn í þeim sem eru svekktir út í útgerðarmenn fannst mér hvimleiður en sem betur fer var hinn hópurinn hallari undir siðmenningu, þannig að engin átök brutust út.

Hinsvegar er það ekkert launungarmál, að ég var í og með að mótmæla þessu arfavitlausa frumvarpi sem ríkisstjórnin er að keyra í gegn og það voru fleiri sjómenn og verkafólk að gera.

Það sem komið hefur fram, varðandi smölun og þrýsting á sjómenn að mæta er lygi og ekkert annað. reyndar ekki fyrsta lygin sem gripið er til, í þeim tilgangi að styrkja málstaðinn, en til lengdar þá getur enginn byggt málstað sinn á lygi, það er skammgóður vermir.

Við sjómenn á skipum HB Granda vorum boðaðir á fund í dag klukkan tvö. Engin var neyddur til að koma og það voru átta kallar, skipsfélagar mínir sem mættu ekki á fundinn. Þeir verða ekki reknir fyrir það, enda var enginn neyddur til að mæta.

Forstjóri fyrirtækisins bar fram þá ósk, að við myndum mæta á Austurvöll, en hann tók það skýrt fram að mönnum væri það í sjálfsvald sett, hvort þeir mættu eða ekki. Enda veit hann það að við sjómenn erum frjálsir menn með sjálfstæðan vilja og látum ekki smala okkur eitt eða neitt, gegn okkar eigin vilja.

En ég klappaði mikið fyrir ályktuninni sem stjórnarliðar fengu eftir fundinn, slíkt hið sama gerðu vinir mínir og kollegar, sem stóðu nálægt mér.

Ekki þekki ég neinn sjómann sem er sáttur við þetta frumvarp, einn ágætur maður hér um borð, sem hefur alla tíð verið eindreginn andstæðingur kvótans sagði að þetta frumvarp væri snargalið og hann var á Austurveli til að mótmæla því.

Við sjómenn flestir kærum okkur ekki um, að stór hluti af þeim verðmætum sem við komum á land verði nýttur í gæluverkefni stjórnvalda. Atvinnuskapandi verkefni kostuð af ríkinu ættu að vera liðin tíð.

Steingrímur á að segja allan sannleikann, í dag var sögulegur dagur fyrir okkur sem viljum stétt með stétt í framkvæmd.  Á Austurvöll mættu útgerðarmenn og sjómenn, með sama markmið að leiðarljósi og hugsuðu eins og einn maður.

Reynir að láta útgerðina ekki gjalda aðgerðanna

Athugasemdir

[Kristinn Karl Brynjarsson, 7.6.2012 kl. 23:58]

Einhvers staðar sá ég ónefndan mann, halda því fram að verslunareigendur, myndu aldrei etja starfsfólki sínu í mótmæli vegna vörugjalds, líkt og LÍÚ gerðu vegna veiðigjalds.

Ég er nú samt þeirrar skoðunar, að starfsfólk í verslunum yrði uggandi um hag sinn, ef að stjórnvöld ákveddu að hækka vörugjöld upp í 70% af söluhagnaði vara. Margir myndu eflaust óttast um starf sitt og afkomu.

Starfsfólk í verslunum, þyrfti því varla nokkra hvatningu til þess að standa með vinnuveitendum sínum, gegn slíku brjálæði. Frekar en sjómenn með sínum vinnuveitendum.....

[Vilhjálmur Eyþórsson, 8.6.2012 kl. 00:52]

Þetta tal um „sægreifa“ minnir stöðugt meira á tal Stalíns um „kúlakka“ og Hitlers um „gyðingaauðvaldið“. Það reyndist þeim kumpánum vel til að vekja hatur. En annars ættu menn alveg að hætta þessu tali um „þjóðareign“ og tala síðan, eins og rétt er um „ríkiseign“. „Þjóðin kemur hvergi nærri. Sá sem hirðir peningana er Steingrímur og hans menn, ekki almenningur.

[Þorgerður 8.6.2012 kl. 16:52]

Nú er mikið reynt að auka hlut þeirra sem mættu til að skemma fyrir þeim sem mættu á samstöðufund á Austurvelli og gengið er svo langt að segja að þetta hafi verið nánast jafn stórar fylkingar. Menn geta virt það fyrir sér á forsíðu morgunblaðsins:

http://tinyurl.com/ck4xkxm

Þarna sjást sjómenn og útgerðarmenn... og svo sést glitta í mótmælendur uppi í hægra horninu með spjöldin sín.

(Reyndar er Eiríkur Stefánsson þarna í forgrunni að troða sér fram að sviðinu, en hann var rekinn frá þegar hann byrjaði að baula).

Menn geta bara rétt ímyndað sér hvaða innræti býr að baki hjá þingmönnum eins og Þór Saari (http://www.mbl.is/frettir/innlent/2012/06/07/atvinnumotmaelendur_og_thy_saegreifa/), Ólínu Þorvarðardóttur (http://blog.eyjan.is/olinath/2012/06/07/sneypufor-liu-a-austurvoll/) og Merði Árnasyni hafa sem finnast þau knúin til að stíga fram og gera lítið úr þessum fundi.

[Jón Ríkharðsson, 8.6.2012 kl. 19:09]

Sammála því sem þú segir Kalli, en það var enginn að etja okkur sjómönnum út í eitt eða neitt. Við viljum ekki sjá þetta frumvarp verða að lögum.

[Jón Ríkharðsson, 8.6.2012 kl. 19:11]

Rétt Vilhjálmur, en það var ekki talað um sægreifa á meðan útgerðarmenn voru á framfæri ríkisins.

Þessi ríkisstjórn fer stöðugt nær kommúnismna, það verður gott þegar hún fer frá völdum.

[Jón Ríkharðsson, 8.6.2012 kl. 19:16]

Þorgerður, við vorum einmitt að ræða það í gær, hversu fámennur hópur þetta var, sem öskraði hvað hæst.

Við sjómenn erum eins og allir vita, annálaðir séntilmenn þannig að við umbárum öskrin og lætin í þessu liði.

Mér finnst ein gömul vísa lýsa ágætlega þeim sem tala niður til okkar sjómanna og segja okkur vera þræla:

Illt er að kanna eðlisrætur,

allt er nagað vanans tönnum,

en eitt er víst að fjórir fætur,

færu betur sumum mönnum.

Vísan lýsir líka ágætlega sumum þingmönnum þjóðarinnar.

[Sigurgeir Jónsson, 8.6.2012 kl. 20:57]

Ólína Þorvarðardóttir setti inn coment á vefsíðu Andra Sigurðssonar í fyrradag, þar sem hún þakkaði þeim sem þar voru að rotta sig saman til að hleypa upp fundinum sem var á Austurvelli í gær.Hún staðfesti það á Útvarpi Sögu í dag, og gortaði sig af því, að hún hefði séð tilefni til þess að þakka þeim og hvetja þá sem ætluðu að reyna að hleypa upp friðsamlega boðuðum fundi,sem þar að auki var fyrir framan Alþingishúsið.Lilja Rafney var litlu skárri hún stjáklaði um meðal ruslaskrílsins sem var að reyna að hleypa upp fundinum, og ég gat ekki séð betur en að hún hvetti þetta lið áfram. Í símtali í dag staðfesti hún að hún hefði ekki átt orðastað við neinn af þeim sem voru með framsögu á fundinum og boðuðu til hans,það er forseta Farmanna og Fiskimannasambandsins,fulltrúa Landsambands smábátaeigenda,formann verkalýðsfélagsins í Vestmannaeyjum,konunnar frá Ólafsfirði,Sveitarstjórann á Grenivík, né formann líú eða einhverja starfandi sjómenn.En þeim tókst ekki að hleypa fundinum upp.Siðferði þessara tveggja Alþingismanna eftir framkomu þeirra er í mínum huga núll.

[Rósa Aðalsteinsdóttir, 8.6.2012 kl. 21:03]

Sæll og blessaður

Þú segir að það sé "lygi" = ósatt að sjómenn hafi verið undir þrýstingi útgerðarinnar. Ég vona að það sé rétt hjá þér en er ekki alveg að kaupa þetta hjá þér :-) Nú er ýmislegt hægt að bjóða sjómönnum og verkalýð sem ekki var hægt á árum áður vegna þess að nú vantar vinnu.

Oft þegar ég hlustaði á fréttir utanúr heimi og heyrði hvernig verkalýðurinn var kúgaður þá hugsaði ég að þetta myndi aldrei gerast á Íslandi en það skjátlaðist mér. Við vitum bæði að fólki hefur verið sagt upp, ráðið aftur með færri tíma og minna kaup.

Shalom/Rósa

[Jón Ríkharðsson, 9.6.2012 kl. 19:18]

Rétt Sigurgeri, þeim tókst ekki að hleypa fundinum upp. Sennilega hefur það verið vegna þess að sjómenn eru seinþreyttir til vandræða og við leyfðum þesu liði að öskra.

Sá vægir sem vitið hefur meira, það eru gömul sannindi og ný.

[Jón Ríkharðsson, 9.6.2012 kl. 19:22]

Rósa mín, það var engin þrýstingur á menn að mæta, átta úr hópi skipsfélaga minna mætti ekki á mótmælin og þeir verða ekki látnir gjalda fyrir það.

Ég man aldrei eftir að hafa verið kúgaður til eins eða neins, enda myndi ég aldrei láta það gerast. Launalækkun getur verið nauðsynleg þegar lítið er um peninga, það er skárra heldur en að segja upp fólki.

Eflaust má finna dæmi um að atvinnurekendur noti sér ástandið, en ég mnydi aldrei láta neinn misnota mig að neinu leiti.

Ég myndi fara til Noregs eða eitthvað annað ef ég væri óhress með framkomu atvinnurekenda, en atvinnurekendur eru bara eins og annað fólk, hvorki betri né verri.