Við þurftum aldrei að óttast Icesave-dóminn.

Steingrímur J. Sigfússon og fleiri ættu að leita sér sálfræðihjálpar til að takast á við kvíðann. Það má teljast kraftaverk að hæstvirtur atvinnuvegaráðherra skuli þora að sitja í bíl, því það er jú meiri möguleiki á að lenda í slæmu bílsslysi en að tapa Icesave málinu fyrir EFTA dómsstólnum.

Allan tímann hefur það verið vitað að okkur bæri ekki skylda til að borga Icesave þannig að dómsstólar geta ekki dæmt neinn til greiðslu nema að einhver lög leggi greiðsluskyldu á viðkomandi.

Stjórnvöld klúðruðu málinu frá upphafi og kenna má þeim um allan vandræðaganginn í þessu máli.

Fyrstu og stærstu mistökin voru að sjálfsögðu þau, að skipa Svavar Gestsson til að veita samninganefndinni forystu.

Vitanlega hefði átt, strax í upphafi, að leita að og ráða harðsnúinn lögfræðing sem hefði reynslu af sambærilegum samningum og íslensk stjórnvöld hefðu aldrei átt að ljá máls á því að borga.

Það er alveg sama hvernig stjórnvöld reyna að klóra í bakkann, þau klúðruðu þessu máli algerlega og ættu að skammast sín.

Flestir vissu að það var ekkert að óttast, það er orðið skrítið þegar almenningur hefur vit fyrir stjórnvöldum og þau sitja sem fastast án þess að láta að því liggja að þau hafi gert eins stór mistök og raun ber vitni. 

Sá sem fallast myndi á að borga himinháar greiðslur, án þess að honum bæri skylda til, nyti örugglega lítillar virðingar samborgara sinna.

Hvað má þá segja um æðstu ráðamenn landsins og jafnvel hámenntaða fræðimenn á sviði hagvísinda? 

 

Athugasemdir

[Hrólfur Þ Hraundal, 29.1.2013 kl. 09:05]

Ágætt hjá þér Jón Ríkharðsson svo sem jafnan.  Stjórnvöldum núverandi var búið að segja staðreyndir þessa máls svo oft að vel hefði átt að duga.  En staðreyndir eru ekki í uppáhaldi hjá þessu setti og þess vegna hefur öllu þessu púðri verið brennt til ónýtis. 

Nú hrópar þetta fólk húrra með krumpuðu slepjubrosi og segir að það eigi ekki að leita að sökudólgum.  Það þarf ekkert að leita, þeir blasa við.  Það sniðuga í þessu dæmi er að sökudólgarnir eru nákvæmlega þeir sömu og hundeltu, hröktu og niðurlögðu þann sem setti neyðarlögin og bjargaði með því, því sem bjargað varð. 

Hvenær losnum við undan nauðung þessa hyskis, sem er ekki einu sinni þess vert að verða sót til saka.     

[Haukur 29.1.2013 kl. 09:07]

Hvað með ríkisstjórn Geir Haarde og þann meirihluta Alþingis sem að í lok árs 2008 lagði upp með að fara samningaleiðina? Þessi grein er varla svaraverð. Það var ekkert fullkomlega ljóst hvernig málið myndi fara og voru flestir lögfróðir menn á þeim buxunum. Þar liggja einmitt mistökin. Árni M. Mathiesen þáveranda fjármálaráðherra gerði samning við breska og hollenska ríkið sem svo Ólafur Ragnar samþykkti með undirskrift. Sá samningur var óhagstæðari en hinir tveir. Þú getur ekki verið svona blindur á ábyrgð þíns eigins flokks. Sjálfstæðisflokkurinn samþykkti svo þessa samninga í seinustu lotu einnig. Ef það er eitthvað klúður hérna þá er það þessi grein!

[Haraldur Rafn Ingvason, 29.1.2013 kl. 10:11]

Í mínum huga stóð óvissan um það hvort dómstóllinn mundi standa af sér þrýsting ESB. Ég átti satt að segja ekki von á að hann stæði hann svona algerlega af sér.

Staðreindin er hins vegar sú að hvort sem það voru dýralæknar eða jarðfræðingar sem voru með málið á sinni könnu þá var samningaferlið eina leiðin sem fær var lengst af til að þoka málum áfram. Það var hins vegar mjög einkennilegt hve menn voru alltaf tilbúnir að sættast á slæma samninga - og börðust hart fyrir þeim.

[Helgi 29.1.2013 kl. 14:10]

Sæll.

@2: Við neyddumst til að fara samningaleiðina vegna þess að Bretar og Hollendingar þurftu að fara með málið fyrir dómstóla - við gátum það ekki. Þér er auðvitað frjálst að greiða mánaðarlega til þessara þjóða fyrir hönd þjóðarinnar ef þú ert ekki sáttur.

Það skiptir engu máli hvað EFTA "dómstóllinn" myndi hafa sagt, hann getur bara komið fram með ráðgefandi álit. Ef dæma á íslenska ríkið þarf að fara með það mál fyrir héraðsdóm Rvk (þar sem hann er varnarþing íslenska ríkisins) og niðurstaða hans væri bindandi, niðurstaða EFTA "dómstólsins" er engan veginn bindandi. Þetta skilja alltof margir ekki þó oft hafi komið fram.

Ég reiknaði alltaf með því að EFTA "dómstóllinn" myndi ekki geta staðið í lappirnar og farið eftir þeim lögum sem giltu en sem betur fer hafði ég rangt fyrir mér, ég bjóst við að öllu yrði skellt á okkur þvert á þær reglur sem giltu.

Þeir sem skellinn hafa fengið í þessu máli er í raun valdastéttin bæði hér og úti, þetta fólk hefur algerlega brugðist!! Kjósendur þurfa að beita útskrikunum núna í vor þannig að þessi stóru mistök fylgi þessum þingmönnum, svona dómgreindarbrestur má ekki gleymast.

[Jón Ríkharðsson, 29.1.2013 kl. 16:57]

Þakka þér fyrir Hrólfur, vonandi losnum við við þau í vor.

[Jón Ríkharðsson, 29.1.2013 kl. 17:01]

Ég skil ekkert í þér Haukur að vera að gera athugasemd fyrst þér finnst þetta ekki svaravert. Með því ergir þú sjálfan þig mest og mig örlítið líka.

Þú veist greinilega ekkert um hvað þú ert að tala. Árni Matthíasson gerði engan samning, þú ert að vísa í minnisblað sem var numið úr gildi þegar Brusselviðmiðin svonefndu voru sett.

Ég nenni ekki að eyða tíma í að útskýra það frekar fyrir þér, það hefur ekkert upp á sig. Það eru sjálfsögð mannréttindi að bulla og þú nýtir þau óspart, enda er það þinn réttur.

[Jón Ríkharðsson, 29.1.2013 kl. 17:04]

Ég var satta að segja viss um að við fengjum þessa niðurstöðu af mörgum ástæðum Haraldur.

Fyrir það fyrsta þá var það ljóst að engin greiðsluskylda hvíldi á íslenska ríkinu og margir lögfróðir menn hafa bent á það, að ef við yrðum þvinguð til að borga þá færi sennilega allt bankakerfi Evrópu í uppnám.

Bretar og hollendingar væru örugglega fyrir löngu farnir í mál við okkur ef þeir teldu líklegt að það skilaði árangri, við vorum ekki ofarlega á vinsældarlista þessara þjóða og þeir sýndu okkur enga miskunn. Þeir vissu að það þýddi ekkert að fara í mál.

[Jón Ríkharðsson, 29.1.2013 kl. 17:05]

Tek undir allt sem þú segir Helgi, stjórnmálamenn skulda þjóðinni skýringar á þessu upphlaupi sínu. Þeir geta eki gengið að traustinu vísu eftir þetta.

[Óskar Sigurðsson, 29.1.2013 kl. 23:16]

Gott Jón. Guð blessaði Ísland.....

[Rafn Guðmundsson, 29.1.2013 kl. 23:16]

baksýnisspegillinn er flottur

[Jón Ríkharðsson, 30.1.2013 kl. 00:07]

Rétt bróðir Óskar, Drottinn vakir sannarlega yfir landinu og þess vegna hefur okkur gengið svona vel.

[Jón Ríkharðsson, 30.1.2013 kl. 00:08]

Baksýnisspegillin er nauðsynlegur og flottur Rafn, það þarf stöðugt að kíkja í hann en gera samt meira af því að horfa fram á veginn. Við sköpum góða framtíð með því að læra af fortíðinni.

[Vilhjálmur Eyþórsson, 30.1.2013 kl. 08:48]

Og eitt einn: Það er út í hött að vegsama forsetann. ÓRG skrifaði undir Svavarssamninginn, en þegar Indefence o.fl. mættu með undirskriftalista sá hann hvernig vindurinn blés og sá sér leik á borði að leirétta mannorðið sem var í ræsinu eftir útrásina. Hann var aðeins að bjarga eigin skinni.