Árás á Baldur Hermannsson?

Lítið hef ég fylgst með fréttum undanfarið, enda búinn að vera önnum kafinn úti á ballarhafi við að efla gjaldeyristekjur þjóðarinnar, en í Fréttablaði dagsins í dag er nefnt nafn bloggvinar míns og góðkunningja Baldurs Hermannssonar á fremur neikvæðum nótum.

Einnig skilst mér að DV og eitthvað blað í Hafnarfirði hafi verið að hnýta í hann.

Baldur er greindur og skemmtilegur maður, hann orðar hlutina á sinn hátt, enda er hann einn af mest lesnu bloggurum hjá mbl.is. Ef menn sleppa móðursýkinni og notast við lesskilning sem þjálfast hjá flestum, þá er heilmikið til í pistlunum hans.

Tilsvörin hjá honum í athugasemdarkerfinu eru hreint frábær, hnyttnar athugasemdir til manna, blandaðar skemmtilegum húmor ættu að geta komið þeim í gott skap, sem ekki þjást af ofurviðkvæmni og árásarhneigð í garð þeirra sem eru þeim ekki sammála.

Baldur kennir í Flensborgarskóla, mér skilst að hann kenni eðlisfræði. Ekki efast ég um að hann nái vel til sinna nemenda og komi þeim ágætlega í skilning um leyndardóma eðlisfræðinnar.

En ekki dettur fjölmiðlum í hug að gera athugasemdir við háskólakennara sem koma fram með ýmist hálfsannleik eða lygi, og þó eru þeir að fjalla um sitt sérsvið.

Þórólfur nokkur Matthíasson prófessor í hagfræði, tjáði landsmönnum það, að allt færi fjandans til ef Svavarssamningurinn hræðilegi yrði ekki samþykktur. Hann beitti ekki þeirri aðferð sem fræðimenn nota ef mál geta brugðist til beggja vona, þ.e.a.s. tala með fyrirvara; "hugsanlega", "gæti skeð", osfrv.

Heldur fullyrti hann það, að við yrðum í stórkostlegum vandræðum ef þessir hörmungarsamningar yrðu ekki samþykktir.

Orð hans reyndust kolröng og aðeins til þess fallin að hræða fólk, sem hefur þá áráttu að trúa hverju orði sem fræðimenn segja og þeir eru víst margir.

Baldur er góðmenni og hann mun aldrei, hvorki setja fólk í gapastokk né heldur misnota konur á kynferðislegan hátt frekar en góðvinur minn og skipsfélagi, en hann vill hengja alla "helvítis stjórnmálamenn upp í hæsta gálga" og refsa öllum embættismönnum af sömu hörku. Engum um borð kemur til hugar að halda að hann meini þetta, vegna þess að hann er ósköp saklaus sál þrátt fyrir sterk lýsingarorð.

En Þórólfur Matthíasson og fleiri, þeir meina hvert orð sem þeir segja, koma með ýmsar fullyrðingar sem standast enga skoðun. Þeir eru friðhelgir. 

Samt virðist í lagi að nafngreina heiðarlegan mann og skammast út í það sem hann ritar.

Það eru ansi margir sem þurfa að fara á námskeið í almennum lesskilningi og læra að lesa á milli línanna.

Athugasemdir

[Sigurbjörg Eiríksdóttir, 2.3.2011 kl. 12:52]

Góð færsla sem ég tek svo sannarlega undir.

Kveðja Silla.

[Sveinn Egill Úlfarsson, 2.3.2011 kl. 13:14]

Ef orðið byrjar á kyn- eitthvað þá fara allar bjöllur að hringja á ritstjórn DV og í góðum Springer pressustíl eru búnar til fyrirsagnir og öllu snúið á haus til að höfða sem best til lágkúrunar.

Á meðan geta spekingar og álitsgjafar, svo ekki sé talað um ráðherrana, hreinlega logið svikið og prettað og það meira að segja á blaðamannafundum en ekki á FB síðum sínum þar sem menn láta eitt og annað fjúka til að espa hvorn annan upp.

Að tvíhenda bullið úr þessum strálstaula sem er Don Quixote réttlætissins og fullur af komplexum yfir femínismanum í sér er náttúrulega neðanbeltis blaðamennska af verstu tegund.

[Eyjólfur G Svavarsson, 2.3.2011 kl. 16:56]

Maður veit nú ekki hverju maður á að trúa. Það er búið að rífa niður Háskólann með því að, Prófessorar í hagfræði eru ekki sammála í neinu og munar þar svo mikkllu, að furðu sætir getur það verið að þessir menn séu menntaðir í sömu grein.Það er bara finnst mér, óhugsandi!!!

[Rafn Haraldur Sigurðsson 2.3.2011 kl. 20:22]

Baldur er einn af skemmtilegustu bloggurum landsins, og ég bíð alltaf spenntur eftir greinunum hans.

[Vilhjálmur Eyþórsson, 2.3.2011 kl. 22:11]

Ég tel mig bera nokkra ábyrgð á þessari svívirðu, sem árásin á Baldur er, því við tveir vorum að hæða feminista og hyskið, sem réðist á Alþingi. Einn þeirra ofbeldismanna, sem kallar sig „Úlfhildarson“ kærði svo Baldur fyrir skólastjóranum og DV tók það svo upp. Ég sagði til dæmis, að „feminista ætti að áreita, hvar sem til þeirra næðist, helst kynferðislega“. Þetta tók Egill Helgason upp á bloggsíðu sinni og sagði að við Baldur værum að „espa upp ofbeldisóra hvor hjá öðrum“. Þetta er í raun ofboðslegt og yfirgengilegt, en þetta pólitískt rétthugsandi ofstækispakk og hyski hugsar í rauninni svona. Það er ömurlegt að búa í landi þar sem svona lið er tekið alvarlega, en þetta segir líka ýmislegt um lágkúrulegan hugarheim Egils Helgasonar.

[Jón Ríkharðsson, 2.3.2011 kl. 23:42]

Þakka ykkur öllum fyrir góðar athugasemdir, Silla, Sveinn Egill, Eyjólfur, Rafn og Vilhjálmur.

Ég hef litlu við þetta að bæta hjá ykkur, er sammála ykkur öllum.

Við erum sammála um að Baldur er skemmtilegur bloggari og einn af þeim vinsælustu, einnig er hann í hópi vinsælustu kennara Flensborgarskóla.

Menn eins og hann lífga upp á tilveruna, hressilegt orðfæri hans blandað skemmtilegri kerskni hefur gert það að verkum, að ég læt aldrei neitt framhjá mér fara á síðunni hans.