Vill Birgitta ekki lýðræði?

Heldur var ég óhress með orð Birgittu Jónsdóttur, þegar hún kvaðst ekki vilja kosningar.

Máli sínu til stuðnings sagði hún, að þá væri endurskoðun stjórnarskrár í uppnámi, einnig breytingar á kvótakerfinu og ýmsar lýðræðisumbætur.

Ég get ekki sagt að ég hafi orðið fyrir vonbrigðum, því aldrei hef ég tekið mark á fólki, sem þykist hafa meiri réttlætiskennd, en almennt gerist. 

Því er ekki að neita, að áleitin grunsemd leitar á hugann, er varðar það, að trygg laun freisti meira en ást á lýðræðinu í ummælum Birgittu. Það er erfitt að fá vinnu um þessar mundir og fyrir marga, þá er þingmannakaupið það besta sem þeir geta fengið, eins og staðan er í dag.

Hvað þýða kosningar á þessum tímapunkti?

Þær þýða ekkert annað en það, að almenningur í landinu fær að velja sér fulltrúa á alþingi.

Ef meirihluti almennings vill breytingar á stjórnarskrá, uppstokkun kvótans og frekari lýðræðisumbætur, þá verður verður væntanlega kosið samkvæmt því.

Sá þingmaður sem ekki treystir þjóðinni til að kjósa, hann á ekki skilið traust frá þjóðinni.

Ekki er ég að mælast til þess að kjósendur kjósi endilega samkvæmt mínum skoðunum, heldur að fólk kjósi það sem því þykir best.

Þingmaður sem óttast kosningar og dóm sinnar eigin þjóðar, hann hefur slæman málstað að verja.

Athugasemdir

[Hrannar Baldursson, 18.4.2011 kl. 13:24]

Mig grunar að ástæður Birgittu hljóti að vera persónulegar. Hugsanlega spila laun eitthvað inn í dæmið, en líka það hvernig Alþingi varði hana í Wikileaks málinu. Það felst meira öryggi í að vera þingmaður en almennur borgari í slíku máli.

[Jón Ríkharðsson, 18.4.2011 kl. 13:53]

Þetta eru óvitlausar pælingar hjá þér Hrannar, en eitt er víst að hún er ekki að hugsa um þjóðarhag.

[Hrannar Baldursson, 18.4.2011 kl. 13:57]

Þetta er ástæðan fyrir að kosið er á fjögurra ára fresti. Þeir sem setið hafa á þingi vilja helst aldrei fara þaðan aftur. Kannski vegna þess að þetta er þægileg innivinna... og fólk verður frægt, kemst í sviðsljósið... Gott fyrir hégómann, ekki það að hégómagirnd sé góð.

[Jón Ríkharðsson, 18.4.2011 kl. 14:11]

Þess vegna þurfum við beint lýðræði hrannar minn, til þess að þingmenn þurfi að sannfæra þjóðina en ekki að standa í eilífum hrossakaupun sín á milli.